Quruqsoy tog‘lari

Yurtimizdagi eng sirli maskanlardan biri Quruqsoy tog‘lari. Bu yerda siz nafaqat ibtidoiy odamlarning g‘or devorlarga tushirgan tasvirlari, g‘ayrioddiy shakldagi qoyalarni ko‘rishingiz, balki “poklanish toshlari”dan ham o‘tishingiz mumkin. Bu toshlar katta qoyalarga o‘xshaydi, ularning o‘rtasi va pastki qismida quloqsimon o‘tish joyi mavjud.

Mahalliy afsonalarda aytilishicha, bunday toshdan o‘tib, gunohlardan butunlay poklanish mumkin. Ushbu toshlarning siri shundaki, odamning hajmi teshikdan o‘tishiga ta’sir qilmaydi, asosiy mezon gunohlarning ko‘p yoki kamligi. Ya’ni, semiz odam teshikdan o‘tishi mumkin, orqasidan kelayotgan ozg‘in odam esa tiqilib qolishi mumkin.